Luke 21

Umnikelo womfelokazi

1Wathi ephakamisa amehlo wabona abanothileyo ^a bephosela iminikelo yabo esitsheni somnikelo ^b. 2Wabona lomfelokazi othile ongumyanga ephosela khona inhlamvana ezincane ezimbili zemali. 3Wathi: Ngiqinisile ngithi kini: Lumfelokazi ongumyanga uphosele okwedlula okwabo bonke; 4ngoba bonke laba baphosele kokunengi kwabo eminikelweni kaNkulunkulu ^c, kodwa yena ebuyangeni bakhe uphosele konke alakho abephila ngakho.

UJesu ukhuluma ngokuchithwa kweJerusalema langokuphela kwesikhathi

5Abanye besakhuluma ngethempeli, ukuthi liceciswe ngamatshe amahle ^d langezipho, wathi: 6Lezizinto elizibonayo, kuzafika insuku okungayikutshiywa ngazo ilitshe phezu kwelitshe, elingayikudilizelwa phansi ^e.

7Basebembuza, besithi: Mfundisi, pho lezizinto zizakuba nini? Lesibonakaliso siyini, lapho sekuzakwenzeka lezizinto? 8Wasesithi: Qaphelani ukuthi lingaduhiswa; ngoba abanengi bazakuza ebizweni lami ^f, besithi: Nginguye ^g; futhi: Isikhathi sesisondele. Ngakho lingabalandeli ^h. 9Njalo nxa lisizwa ngezimpi langeziphithiphithi ⁱ, lingethuki ^j; ngoba lezizinto zimele ukuthi zenzeke kuqala, kodwa ukuphela kakuhle kufike ^k.

10Wasesithi kubo: Isizwe sizavukela isizwe, lombuso uvukele umbuso; 11njalo kuzakuba khona ukuzamazama komhlaba okukhulu indawo ngendawo lezindlala labomatshayabhuqe bezifo; kube khona lezinto ezesabekayo lezibonakaliso ezinkulu ezivela ezulwini.

12Kodwa ngaphambi kwakho konke lokhu bazalibamba ngezandla zabo, balizingele ^l, balinikele emasinagogeni lezintolongweni, balise phambi kwamakhosi lababusi, ngenxa yebizo lami ^m. 13Njalo lokhu kuzaphenduka kini kube yibufakazi ⁿ. 14Ngakho kubekeni enhliziyweni zenu ^o ukuthi linganakani ngaphambili ngelizakuphendula ^p; 15ngoba mina ngizalinika umlomo lenhlakanipho, abangekuphike, bamelane lakho ^q, bonke abayizitha zenu. 16Njalo lizanikelwa langabazali labafowenu lezihlobo labangane, njalo bazabulala abanye benu. 17Njalo lizazondwa yibo bonke ngenxa yebizo lami. 18Kodwa kakuyikulahleka ngitsho unwele lwekhanda lenu ^r. 19Ekubekezeleni kwenu ^s zuzani imiphefumulo yenu ^t.

20Kodwa nxa libona iJerusalema ihanqwe ngamabutho ^u, yazini-ke ukuthi sekusondele ukuchitheka kwayo ^v. 21Ngalesosikhathi abaseJudiya kababalekele ezintabeni; labaphakathi kwayo baphume; labasemaphandleni ^w bangangeni kuyo ^x. 22Ngoba lezi zinsuku zempindiselo ^y, ukuze kugcwaliseke zonke izinto ezilotshiweyo ^z. 23Kodwa maye kwabakhulelweyo labamunyisayo ngalezonsuku! Ngoba kuzakuba khona ukuhlupheka okukhulu emhlabeni, lolaka kulesisizwe ^aa. 24Njalo bazakuwa ngobukhali benkemba, bathunjelwe ezizweni zonke ^ab; leJerusalema inyathelelwe phansi ngabezizwe ^ac, kuze kugcwaliseke izikhathi zabezizwe ^ad.

25Kuzakuba khona izibonakaliso elangeni lenyangeni lezinkanyezini; lemhlabeni usizi lwezizwe ngokudideka ^ae; kudume ulwandle lamagagasi, 26abantu baphele amandla ngenxa yokwesaba langokulindela lokho okuzayo emhlabeni; ngoba amandla amazulu azazanyazanyiswa ^af. 27Khona-ke bezayibona iNdodana yomuntu isiza eyezini ilamandla lenkazimulo enkulu. 28Njalo nxa kuqala ukwenzeka lezizinto, manini liqonde njalo liphakamise amakhanda enu ^ag; ngoba kusondele ukukhululwa kwenu ^ah.

29Wasebatshela umfanekiso: Khangelani umkhiwa lazo zonke izihlahla; 30nxa sezihluma, liyazibonela lani likwazi ukuthi ihlobo selisondele. 31Ngokunjalo lani, nxa libona lezizinto zisenzeka, yazini ukuthi umbuso kaNkulunkulu useduze. 32Ngiqinisile ngithi kini: Lesisizukulwana asisoze sidlule, kuze kwenzeke zonke izinto. 33Kuzadlula izulu lomhlaba, kodwa amazwi ami kawasoze adlule ^ai.

34Njalo ziqapheleni ^aj, ukuthi inhliziyo zenu zingasindwa ngenxa yokuminza lokudakwa ^ak lokuphisekela izinto zalokhukusila ^al, lalolosuku lulifikele lingananzelele ^am; 35ngoba luzafika njengomjibila phezu kwabo bonke abahlezi ebusweni bomhlaba wonke ^an. 36Ngakho lindani ngezikhathi zonke ^ao likhulekele ^ap ukuthi lifanele ukuphepha zonke lezizinto ezizakwenzeka ^aq, lokuma phambi kweNdodana yomuntu ^ar.

37Njalo wayefundisa ^as ethempelini emini ^at; kodwa ebusuku wayephuma ayehlala ^au entabeni ethiwa ngeyeMihlwathi ^av. 38Lekuseni kakhulu abantu bonke babesiza kuye ^aw ethempelini ukumuzwa ^ax.